
密勒日巴大师教言集MILA2རྗེ་བཙུན་ཆེན་པོ་བཞད་པ་རྡོ་རྗེ་ལ་གསོལ་བ་འདེབས་པའི་ཚིགས་སུ་བཅད་པ་དད་པའི་མིག་འབྱེད་ངོ་མཚར་འོད་ཀྱི་ཕྲེང་བ།
3-1-1a
༄༅། །རྗེ་བཙུན་ཆེན་པོ་བཞད་པ་རྡོ་རྗེ་ལ་གསོལ་བ་འདེབས་པའི་ཚིགས་སུ་བཅད་པ་དད་པའི་མིག་འབྱེད་ངོ་མཚར་འོད་ཀྱི་ཕྲེང་བ།
༄༅། །གངས་ཅན་གྲུབ་པའི་གཙོ་བོའི་ངོ་མཚར་གཏམ། །ཐོས་ན་ཡ་མཚན་དད་པའི་མིག་འབྱེད་པའི། །མཐོང་ན་ངོ་མཚར་འོད་ཕྲེང་འགྱེད་པ་འདིས། །སྐལ་ལྡན་དད་གུས་ཅན་གྱི་དགའ་སྟོན་མཛོད། །
3-1-1b
༄༅༅། །ན་མ་ཤྴྲཱི་གུ་རུ་མཧཱ་བཛྲ་དྷཱ་ར་ཧ་ས་བཛྲ་ཡ། རྣལ་འབྱོར་དབང་ཕྱུག་རྗེ་བཙུན་ཆེན་པོ་བཞད་པའི་རྡོ་རྗེ་ལ་གསོལ་བ་འདེབས་པའི་ཚིགས་སུ་བཅད་པ་དད་པའི་མིག་འབྱེད་ངོ་མཚར་འོད་ཀྱི་ཕྲེང་བ་ཞེས་བྱ་བ། རྗེ་བཙུན་བླ་མ་ཉིད་དང་། བཀའ་བརྒྱུད་རིན་པོ་ཆེ་སྤྲུལ་པའི་སྐྱེས་མཆོག་ཐམས་ཅད་ལ་སྒོ་གསུམ་གུས་པས་ཕྱག་འཚལ་ཞིང་སྐྱབས་སུ་མཆིའོ། །དུས་ཐམས་ཅད་དུ་འབྲལ་བ་མེད་པར་རྗེས་སུ་གཟུང་དུ་གསོལ། གང་ཞིག་གུས་པས་གཙུག་ཏུ་ལེགས་བསྟེན་ཏེ། །ཟོལ་མེད་དད་པས་རྩེ་གཅིག་གསོལ་བཏབ་ན། །ཚེ་འདིར་སངས་རྒྱས་སྟེར་བའི་ཐུགས་རྗེ་ཅན། །སྐྱབས་མཆོག་འགྲན་
3-1-2a
ཟླ་མེད་ལ་གསོལ་བ་འདེབས། །སངས་རྒྱས་ཀུན་གྱི་སྔར་ཁྱོད་སངས་རྒྱས་ཀྱང་། །ད་དུང་སྲིད་པར་བཞུགས་ནས་སྲིད་འགྲོ་སྒྲོལ། །སྲིད་ཞིར་མི་གནས་སྲིད་ཞི་ཀུན་གྱི་མགོན། །ཁྱབ་བདག་སྒྱུ་འཕྲུལ་མཁན་ལ་གསོལ་བ་འདེབས། །རྨད་བྱུང་འགྲན་ཟླ་བྲལ་བའི་བརྩོན་འགྲུས་ཀྱིས། །རྡོ་རྗེ་ཐེག་པའི་ཉེ་ལམ་ལུས་འདིས་བགྲོད། །མི་འགྱུར་བདེ་བ་མཆོག་གི་རོལ་རྩེད་ལས། །སླར་ཡང་སྐུ་གསུམ་བརྙེས་ལ་༴། །བསམ་བཞིན་སྲིད་པར་སྐྱེ་བ་ཡོངས་བཟུང་ནས། །གདུལ་བྱའི་དོན་དུ་ཞིང་འདིར་བྱོན་པའི་ཚེ། །གུང་ཐང་རྩྭ་ཞེས་གྲགས་པའི་ས་ཕྱོགས་སུ། །ངོ་མཚར་ལྟས་བཅས་འཁྲུངས་ལ་༴། །མི་ལ་ཞེས་བྱའི་གདུང་གིས་མངོན་མཐོ་བའི། །ཐབས་ཆེན་ཡབ་ཀྱི་ཚུལ་འཛིན་ཤེར་རྒྱལ་དང་། །ཤེས་རབ་ཡུམ་མཆོག་
3-1-2b
མྱང་ཚ་དཀར་རྒྱན་གྱི། །སྲས་ཀྱི་ཐུ་བོར་གྱུར་ལ་༴། །དགུང་ལོ་བདུན་པའི་ཚེ་ན་ཡབ་དང་བྲལ། །ནོར་རྫས་ཁང་ཞིང་ཉེ་གཞིའི་གཉེན་གྱིས་ཕྲོགས། །ཚེ་འདིའི་འདུན་ཐག་སྟོན་ཀའི་སྤྲིན་ལྟར་ཆད། །སྡུག་ཅིང་ཕོངས་ཚུལ་བསྟན་ལ་༴། །བཅོ་ལྔའི་ལོ་ལ་མི་ཐོད་གད་ཁ་ཞེས། །གྲགས་པའི་གནས་སུ་ཀློག་བྲིས་ཆོག་འཕྲིན་བསླབ། །ཤེས་བྱའི་གནས་ཀུན་འབད་མེད་མཁྱེན་པ་ལས། །ཐོས་པ་དགའ་ཞེས་གྲགས་ལ་༴། །ཉེ་བ་དགྲར་ལངས་ཡུམ་གྱིས་མ་བཟོད་པར། །མཆི་མས་གང་བའི་གདོང་གིས་ལེགས་བལྟས་ཏེ། །འདི་དག་མངོན་སྤྱོད་དྲག་པོས་ཚར་ཆོད་ཅེས། །ཡང་ཡང་བསྐུལ་མ་བཏབ་ལ་༴། །རིན་ཆེན་གཡུ་དང་རྟ་མཆོག་ངུར་ཚོས་སོགས། །བསྣམས་ནས་དབུས་ཀྱི་ཡར་ལུངས་ཀྱོར་གྲོང་དུ། །བྱོན་ཏེ་གཡུང་སྟོན་ཞེས་བྱའི་བླ་མ་བསྟེན། །ཅི་མཉེས་ཞབས་ཏོག་མཛད་ལ་༴། །དེ་ཚེ་བླ་མ་དེ་ཡིས་ལེགས་བརྟགས་པས། །གནོད་བྱེད་དགྲ་བོ་ཚར་གཅོད་ཡུལ་དུ་དགོངས། །ཁུ་ལུང་སྣུབས་སྟོན་དྲུང་དུ་བརྫངས་ནས་དེར། །གཟའ་གདོང་དམར་ནག་གསན་ལ་༴། །བརྩོན་འགྲུས་དྲག་པོས་ཞག་གསུམ་མཐུ་བསྒྲུབས་པས། །སྡེ་བརྒྱད་ལས་ལ་འཁོལ་བའི་ནུས་པ་ཐོབ། །བཅུ་ཕྲག་གསུམ་དང་ལྔར་བཅས་དུས་གཅིག་བསྒྲག །མཐུ་ཆེན་གྲགས་པ་ཐོབ་ལ་༴། །མ་ལ་བུ་སྐྱེས་བསམས་པ་གྲུབ་བོ་ཞེས། །བྱ་དགར་བཅས་པའི་འཕྲིན་ཡིག་གིས་བསྐུལ་ནས། །སླར་ཡང་གཡུང་སྟོན་བསྟེན་ཏེ་
3-1-3a
སེར་བ་སྒྲུབས། །ལོ་ཏོག་མིང་མེད་བཏང་ལ་༴། །དེ་རྗེས་དམ་པའི་ཆོས་ལ་ཡིད་ཕྱོགས་པས། །བླ་མས་བཀའ་གནང་ཉང་སྟོད་རི་ནང་དུ། །རོང་སྟོན་ལྷ་དགའ་བསྟེན་ནས་རྫོགས་ཆེན་གསན། །དགྱེས་བཞིན་ལུང་བསྟན་མཛད་ལ་༴། །སྒྲ་བསྒྱུར་སྐྱེས་མཆོག་མར་པའི་མཚན་ཐོས་པས། །སྐུ་ཚེ་དུ་མའི་འདྲེན་པར་ལེགས་དགོངས་ཤིང་། །བ་སྤུ་གཏིང་ནས་གཡོ་བའི་དད་པ་ཐོབ། །གུས་པས་ཞབས་དྲུང་སྙེགས་ལ་༴། །མཇལ་མ་ཐག་ཏུ་ཞབས་པད་གཙུག་ཏུ་བླངས། །སྒོ་གསུམ་ལོངས་སྤྱོད་བཅས་པ་བྲན་དུ་ཕུལ། །སྡིག་ཅན་ཐུགས་རྗེས་གཟིགས་ཤིག་གསོལ་བཏབ་ནས། །ཅི་གསུང་བཀའ་བཞིན་བསྒྲུབ་ལ་༴། །རུ་བཞི་ལུང་གིས་སྤྲས་པའི་རིན་ཆེན་སྣོད། །དྲི་མས་མ་གོས་ཕུལ་བའི་རྟེན་འབྲེལ་ལས། །སྣོད་ལྡན་གདུལ་བྱར་གཟིགས་ཤིང་བརྒྱུད་འཛིན་གྱི། །བུ་ཆེན་ལུང་བསྟན་མཛད་ལ་༴། །སེར་བ་ཕབ་ནས་བླ་མའི་སྐུ་དགྲ་བཏུལ། །གཟིམས་ཁང་དོན་དུ་སྐུ་རྒྱབ་སྒལ་པར་བཏབ། །འདམ་རྫབ་ཁྲོད་དུ་ཡུམ་གྱི་སྐུ་སྟེགས་མཛད། །ཐུགས་བཞེད་དགོངས་པ་བསྐངས་ལ་༴། །དབང་གི་གྲལ་ནས་ཡང་ཡང་ཕྱི་རུ་བཏོན། །བཀའ་བཀྱོན་ཕྱག་འབེབས་བརྡུང་བཏགས་མང་དུ་མཛད། །ཡི་ཆད་སྒྱིད་ལུག་སེམས་ཞུམ་དུ་མ་ཡིས། །སྒྲིབ་སྦྱོང་ཐབས་ཚུལ་བསྟན་ལ་༴། །ཇོ་མོས་བཀའ་གནང་རྔོག་སྟོན་དྲུང་དུ་བྱོན། །དེར་ཡང་དགྲ་ལ་རྡོ་རྗེའི་སེར་ཆེན་ཕབ། །དགྱེས་པ་རྡོ་རྗེའི་
3-1-3b
དབང་དང་གདམས་པ་སོགས། །གསན་ཞིང་ཐུགས་སུ་ཆུད་ལ་༴། །སྒྲ་བསྒྱུར་ཆེན་པོའི་གསུང་གིས་བསྐུལ་ནས་སླར། །ཞབས་དྲུང་ཕེབས་པས་སྤྲོ་བ་བསྐྱེད་པའི་བཀའ། །མང་དུ་གནང་ཞིང་བདུད་རྩི་ལྷག་མེད་གསོལ། །བརྩེ་བས་རྗེས་སུ་བཟུང་ལ་༴། །རྡོ་རྗེ་རྒྱལ་མཚན་ཞེས་པར་མཚན་གསོལ་ནས། །བསྟན་པའི་སྒོར་བཅུག་དགེ་བསྙེན་སྡོམ་པ་བཞེས། །དབང་བསྐུར་གསང་མཚན་བཞད་པའི་རྡོ་རྗེར་བཏགས། །ཡི་དམ་དངོས་སུ་གཟིགས་ལ་༴། །རྗེ་ལ་རྡོ་རྗེ་འཆང་དུ་ངེས་ཤེས་སྐྱེས། །སྒྲུབ་ལ་བརྩོན་པས་མཁའ་འགྲོས་ལུང་བསྟན་ཞིང་། །དཔལ་ལྡན་ནཱ་རོས་རྗེས་སུ་ཡི་རང་མཛད། །གཅིག་བརྒྱུད་གདམས་པ་ཐོབ་ལ་༴། །མནལ་ལམ་ལྟས་ལ་བསྟན་པའི་དར་རྒྱས་ཤར། །ཀ་བཞིའི་མགུར་གསུངས་བརྡ་བགྲོལ་ལུང་བསྟན་མཛད། །ཆོས་བདག་དབང་བཞག་དབུ་སྙུང་བཞེས་ནས་སླར། །ཟབ་ཆོས་ལྷག་མེད་སྩལ་ལ་༴། །ཚེ་འདིའི་དོན་གཉེར་མི་དང་འདྲིས་འགྲོགས་བསྐྱངས། །ཟས་ནོར་ངོ་དགའི་ཕྱིར་དུ་ཆོས་མ་བཤད། །ལས་ཅན་སློབ་མ་རྗེས་བཟུང་བསྟན་པ་སྤེལ། །ཞེས་གསུངས་བཀའ་རྒྱས་བཏབ་ལ་༴། །སྒྱུ་མ་འོད་གསལ་འདྲེས་པའི་གསལ་སྣང་ལ། །རང་གི་ཡུལ་གཟིགས་མ་ཡུམ་སྲིང་མོ་འཁྱམས། །ཁང་པར་ཞིག་སོགས་དགོངས་ནས་རྗེ་ལ་ཞུས། །ལྐོག་གྱུར་ཡུལ་སྣང་གཟིགས་ལ་༴། །ཆོས་ཀུན་སྒྱུ་མ་ལྟ་བུར་ངོ་སྤྲད་ནས། །ཟད་མེད་བསམ་གཏན་ཟས་ཀྱིས་འཚོ་འགྱུར་ཞིང་། །བཀའ་བརྒྱུད་བསྟན་པ་ཕྱོགས་བཅུར་རྒྱས་འགྱུར་གྱིས། །རི་ཁྲོད་འགྲིམས་ལ་སྒྲུབ་པའི་རྒྱལ་མཚན་ཚུགས། །ཞེས་གསུང་སྐུ་ཡི་རྣམ་འཕྲུལ་དུ་མ་བསྟན། །རྩ་རླུང་གེགས་ལས་གྲོལ་བའི་གདམས་ངག་གནང་། །གསང་
3-1-4a
སྤྱོད་ཉམས་སུ་ལོང་ཞེས་ཞལ་བསྒོས་མཛད། །སྒྲོ་འདོགས་མ་ལུས་ཆོད་ལ་༴། །རྩ་རླུང་ནུས་པ་ཐོན་པའི་ཡོན་ཏན་གྱིས། །ཞག་པོ་གསུམ་ལ་རང་ཡུལ་ཕེབས་པར་བྱོན། །མི་རྟག་མགུར་གསུངས་མ་རྒན་མཐོ་རིས་དྲངས། །ལྟོས་མེད་རི་ཁྲོད་གཤེགས་ལ་༴། །གཉེན་དང་བཤེས་ལ་ཁོ་ཐག་གཏིང་ནས་ཆོད། །ཞིམ་མངར་ཟས་ཀྱི་རོ་ལ་ཞེན་པ་སྤངས། །ཚྭ་རྡོར་(སྡོར་)ཐལ་མེད་ཟ་ལ་འཚོ་བ་མཛད། །དཀའ་ཐུབ་མཐའ་རུ་ཕྱིན་ལ་༴། །སྐུ་ལུས་མི་སྡུག་འདྲེ་ཡི་གཟུགས་འདྲར་གྱུར། །མནལ་ལྟས་བརྡ་དགོངས་ལམ་ལ་བརྩོན་འགྲུས་བརྩམས། །མཁའ་འགྲོས་རྡོ་རྗེ་ལུས་ཀྱི་གཅུན་ཐབས་བསྟན། །ཐབས་ལམ་ཡོན་ཏན་རྫོགས་ལ་༴། །ལུས་ལ་གོས་མེད་གྲང་བའི་རེག་བྱ་བྲལ། །ཟས་ལ་ཞེན་མེད་ཏིང་འཛིན་བདུད་རྩིས་འཚོ། །འབྱུང་བ་དབང་འདུས་མཁའ་ལ་བྱ་བཞིན་སྤྱོད། །ཉམས་རྟོགས་མཐའ་རུ་ཕྱིན་ལ་༴། །བྲག་དཀར་རྟ་སོར་དབུ་མའི་མདུད་པ་གྲོལ། །ལིང་པའི་བྲག་ལ་བྲག་སྲིན་དམ་ལ་བཏགས། །སྨན་འཁྱུགས་གྲིབ་མའི་རྫོང་དུ་གཏུམ་མོ་ཡི། །བདེ་དྲོད་མེ་ལྟར་འབར་ལ་༴། །སྐྱང་འཕན་རྫོང་དུ་ལྟ་བ་ཕྱོགས་མེད་རྟོགས། །རག་མའི་རྫོང་དུ་བྱང་ཆུབ་ཐུགས་གཉིས་འཁྲུངས། །བྲག་སྐྱའི་རྫོང་དུ་རྡོ་རྗེ་ལྟ་བུ་ཡི། །ཏིང་འཛིན་མངོན་དུ་མཛད་ལ་༴། །རང་གི་ཆུང་གཉེན་མཛེས་སེ་ཞེས་བྱ་དང་། །མག་པ་བསྐྱེད་ཀྱིས་བཙལ་ཞིང་རྗེས་སྙེགས་ནས། །བཅུད་ལྡན་ཟས་དྲངས་རྩ་མདུད་མ་ལུས་གྲོལ། །ཡིད་འོང་གཞོན་ཤ་རྒྱས་ལ་༴། །བྲག་དམར་སྤོ་མཐོན་བདུད་མོ་སྟག་འགྲན་ཞེས། །གྲགས་པའི་ཨ་ནེ་རྗེས་བཟུང་གྲོལ་བར་མཛད། །སྙན་བརྒྱུད་གདམས་པ་བསྟན་ནས་
3-1-4b
པེ་ཏ་སོགས། །མཁའ་སྤྱོད་གནས་སུ་བཏང་ལ་༴། །སྙི་ཤངས་རི་ལ་ཁྱི་དང་ཤ་བ་ལ། །སྒོམ་བཏབ་མགོན་པོ་རྡོ་རྗེ་རྗེས་སུ་བཟུང་། །མི་དགེ་སྡིག་ཏོའི་ལམ་ལས་ཕྱིར་བཟློག་ནས། །ཡང་དག་ལམ་ལ་བཀོད་ལ་༴། །ཏི་སི་གངས་ལ་ནཱ་རོ་བོན་ཆུང་དང་། །རྫུ་འཕྲུལ་འགྲན་ཞིང་ཟིལ་གྱིས་མནན་ནས་ཀྱང་། །གངས་ཅན་ཁྲོད་འདིར་སྒྲུབ་བརྒྱུད་བསྟན་པ་བཙུགས། །བསྟན་པའི་སྒྲོན་མེའི་ཞབས་ལ་༴། །ལ་ཕྱི་གངས་ལ་ཉིན་ཞག་བཅོ་བརྒྱད་དུ། །ཁ་བའི་རྒྱུན་བབས་འཆི་བའི་ཟས་མེད་ཀྱང་། །མཁའ་འགྲོས་གུས་མཆོད་ཏིང་འཛིན་བདུད་རྩིས་འཚོ། །སྤྲུལ་བསྒྱུར་རྫུ་འཕྲུལ་བསྟན་ལ་༴། །དད་ལྡན་གདུལ་བྱས་ཡང་ཡང་གསོལ་བཏབ་ནས། །གཉའ་ནང་བྱོན་ཏེ་གངས་མགུར་གསུངས་པའི་སར། །རྡོ་ཆེན་འཇིམ་པ་བཞིན་དུ་ཞབས་ཀྱིས་བརྫིས། །རྩོད་མེད་ཀུན་ཏུ་གྲགས་ལ་༴། །ཏིང་འཛིན་སྒོ་བརྒྱ་ཕྱེད་པའི་གཟིགས་སྣང་ལ། །མཐུན་དང་མི་མཐུན་བར་མའི་སྣང་བ་སོགས། །ཁམས་འདུས་ཉམས་ཀྱི་བྱེ་བྲག་དུ་མ་བྱུང་། །ཀུན་ཀྱང་གྲོགས་སུ་ཤར་ལ་༴། །སེང་ལྡེང་ནགས་སུ་སྤྲོས་བྲལ་ཆུང་ངུའི་ཚེ། །བག་མེད་གཅེར་བུར་རིགས་ངན་བུ་མོར་རོལ། །དངུལ་དཀར་མེ་ལོང་གཟིགས་ཤིང་ནམ་མཁའ་ལ། །སྐུ་ལུས་ཐིམ་ཚུལ་བསྟན་ལ་༴། །མཆོད་ལུང་བྲག་ལ་ཉི་ཟླ་གོས་སུ་གྱོན། །མེ་ཏོག་ཕྲེང་བའི་ཐོད་བཅིངས་ཐལ་ཆེན་དང་། །རག་ཏས་ལུས་བྱུགས་གདུགས་དང་རྒྱལ་མཚན་བསྣམས། །སེང་ཆིབས་མཁའ་ལ་གཤེགས་ལ་༴། །གནས་མཆོག་བཀྲ་ཤིས་དཔལ་གྱི་ཆུ་དབར་དུ། །མཉམ་ཉིད་འོད་གསལ་ངང་ལ་བཞུགས་པའི་ཚེ། །འཇིགས་པའི་གཟུགས་ཅན་ཤ་ཟ་ཆེན་མོ་ལྔས། །མཐོ་འཚམས་ཆོ་འཕྲུལ་
3-1-5a
བསྟན་ལ་༴། །དེ་ཚེ་རྒྱ་མཚོའི་གླིང་དུ་མདུང་རྩེ་ལ། །སྐྱིལ་ཀྲུང་བཅས་ཤིང་མེ་དཔུང་གོས་སུ་གྱོན། །དུག་སྦྲུལ་ཐོད་བཅིངས་ནོར་བུ་སྒོང་དུ་རྩེག །རི་བོ་ཁུར་མེད་གསལ་ལ་༴། །ས་རྡོ་རི་བྲག་རྒོད་ཅིང་ནགས་ཚལ་མགུལ། །གནམ་འགྱུར་ས་གཡོས་གཟུགས་མེད་ལག་པ་རྐྱོང་། །མཚོན་ཆའི་ཆར་པ་འབབས་སོགས་བསྟན་ན་ཡང་། །གཡོ་མེད་ཏིང་འཛིན་བཞུགས་ལ་༴། །ཁྲག་འཛག་ཅེ་སྤྱང་གདོང་ཅན་རྒྱ་མཚོ་རྔུབ། །ཀེང་རུས་བུད་མེད་རི་རབ་པང་དུ་འདེགས། །གཤིན་རྗེའི་གཟུགས་ཅན་ཉི་ཟླ་ཆ་ལང་བརྡེབས། །སོལ་བའི་ན་ཆུང་བཟའ་སྐར་ཐང་ལ་འབེབས། །མཛེས་ཤིང་འཛུམ་པའི་ལྷ་མོས་བསླུ་བྲིད་བྱེད། །ནམ་མཁའ་མེས་འཁྲིགས་ཕྱོགས་བཞི་འོབས་ཀྱིས་བསྐོར། །ས་གཞི་ཆུས་ཁེངས་མཚམས་བཞི་གྱད་ཀྱིས་བསྲུང་། །ངོ་མཚར་ཅི་ཡང་གཟིགས་ལ་༴། །སྐུ་ལུས་གདན་ལ་བལྟོས་མེད་མཆོད་སྦྱིན་བསྔོས། །སྤྲོས་བྲལ་རྟོགས་པ་རོ་གཅིག་ཀློང་དུ་འཕོས། །མེ་དཔུང་འབར་ལ་ཤིང་བཞིན་དེ་དག་ཀུན། །ལམ་གྱི་གྲོགས་སུ་ཤར་ལ་༴། །འདྲེ་ཚོགས་དེ་རྣམས་རྩེ་གཅིག་དད་པ་ཐོབ། །ལྟས་དང་ཆོ་འཕྲུལ་བཏུལ་ནས་ཞི་བར་གནས། །ནོངས་པ་བཟོད་གསོལ་ཅི་གསུང་འཕྲིན་ལས་བསྒྲུབ། །མ་ལུས་དམ་ལ་བཏགས་ལ་༴། །ཤ་ཟ་ཆེན་མོ་དེ་ལྔ་མཁའ་འགྲོ་ལྔར། །གྱུར་ཏེ་ཞབས་ལ་སྤྱི་བོས་ཕྱག་བྱས་ཤིང་། །རིན་ཆེན་སྣོད་དུ་བཅུད་ལྡན་ཟས་ཀྱིས་མཆོད། །བྱང་ཆུབ་སེམས་མཆོག་བསྐྱེད་ལ་༴། །བཀའ་དྲིན་ཡོན་དུ་ཐུན་མོང་དངོས་གྲུབ་ཕུལ། །གནོད་འཚེ་སྤོང་བར་ཁས་བླངས་རྩིགས་ལ་ཕབ། །ལས་འབྲས་ཆོས་དང་བྱང་སེམས་ཕན་ཡོན་བསྟན། །བསྟན་པའི་བསྲུངས་མར་བསྐོས་ལ་༴། །སླར་ཡང་
3-1-5b
དེ་རྣམས་མི་མོ་གཞོན་ནུ་ཡི། །ཚུལ་དུ་སྤྲུལ་ཏེ་ཡེངས་ནས་རྟོགས་མེད་ཀྱི། །ཐུགས་དགོངས་མགུར་དུ་ཞུས་བས་དགྱེས་བཞིན་གནང་། །དབང་དང་གདམས་པ་བསྟན་ལ་༴། །མིག་བསྒྱུར་གློག་ལྟར་འཁྱུག་པའི་ཕོ་ཉ་མོས། །རྫུ་འཕྲུལ་འོད་ཀྱི་ལམ་ལ་སྤྱན་དྲངས་ཏེ། །ཞིང་སྐྱོང་གཙོ་མོ་འཆི་བདག་འཇིགས་ལས་བསྐྱབ། །སྐྱེ་འགྲོའི་དལ་ཡམས་བསལ་ལ་༴། །མཁའ་འགྲོ་འཁོར་བཅས་སྤྱན་སྔར་ཡང་འཁོད་ནས། །བཀའ་དྲིན་དྲན་པའི་གཏང་རག་གླུ་རུ་བླངས། །བསྐྱེད་རྫོགས་ཟུང་འཇུག་སྐུ་བཞིའི་ངོ་སྤྲོད་ཀྱི། །གདམས་པས་གྲོལ་བར་མཛད་ལ་༴། །དེ་སོགས་གྲངས་མེད་བསམ་གྱིས་མི་ཁྱབ་པའི། །བར་ཆད་བདུད་དཔུང་གཡུལ་ལས་རྣམ་རྒྱལ་ཞིང་། །ཚེ་གཅིག་ཉིད་ལ་རིག་འཛིན་སར་གཤེགས་ནས། །བླ་མེད་བྱང་ཆུབ་བརྙེས་ལ་༴། །ཞི་བ་འོད་ཀྱིས་མ་དང་བཟློག་པའི་ཕྱིར། །ཆུ་སྟེང་{ལྡང་}ལྟར་གཤེགས་ནས་རྗེས་སུ་བཟུང་། །འཇའ་ལུས་མཁའ་སྤྱོད་གོ་འཕང་མཆོག་ལ་བཀོད། །ཟླ་མེད་འདྲེན་པའི་གཙོ་ལ་༴། །གཤིན་པོ་དངོས་སུ་བཀུག་ནས་རྣམ་ཤེས་སྤར། །དབང་བསྐུར་མཛད་ཚེ་བུམ་པ་མཁའ་ལ་སོང་། །རབ་གནས་དུས་སུ་ལྷ་ཡིས་མེ་ཏོག་བླངས། །ཡ་མཚན་གྲུབ་རྟགས་བསྟན་ལ་༴། །ཚེ་རིངས་ལིང་པ་མ་དང་ཟུལ་ལེ་མ། །མངལ་སྐྱེས་སྒྲོན་ན་མཛེས་སེ་ལེགས་སེ་སོགས། །གསང་ཡུམ་གསང་བའི་འགྲོས་བཞིས་སྨིན་མཛད་ནས། །ལྷན་སྐྱེས་ཡེ་ཤེས་བསྐྱེད་ལ་༴། །ཐེད་ལའི་རྩེ་མོར་དམ་པ་སངས་རྒྱས་དང་། །མཇལ་ནས་ཕན་ཚུན་ཆོས་ཀྱི་བཀའ་མཆིད་མཛད། །ཟིལ་གྱིས་མི་ནོན་རྫུ་འཕྲུལ་འགྲན་ནས་སླར། །མོས་གུས་དག་སྣང་མཛད་ལ་༴། །སྤྲུལ་བསྒྱུར་ལུས་ཀྱིས་གཡག་རུའི་ནང་དུ་ཞུགས། །སྐུ་ལ་ངོ་མཚར་བཀོད་པ་སྣ་
3-1-6a
ཚོགས་བསྟན། །རྡོ་རྗེ་འཆང་དང་ཐུབ་ཆེན་སྐུར་མཛད་ནས། །རས་ཆུང་ངར་རྒྱལ་བཅག་ལ་༴། །སེངྒེ་ཆིབས་ཤིང་ཤེལ་གྱི་མཆོད་རྟེན་དུ། །སྤྲུལ་ནས་སྐར་མདའ་བཞིན་དུ་མཁའ་ལ་གཤེགས། །རྒྱ་གར་དྷརྨ་བོ་དྷིས་ཕྱག་བྱས་ཏེ། །འགྲན་པའི་ཟླ་མེད་གྱུར་ལ་༴། །ང་རྒྱལ་ཅན་གྱི་སྟོན་པ་ཚར་བཅད་ཅིང་། །ཕྲག་དོག་འགྲན་སེམས་ཅན་རྣམས་ཐབས་ཀྱིས་བཏུལ། །སྐུ་ལུས་གཡོ་མེད་ཕ་བོང་ལྟར་བརྟན་ནས། །ལོག་རྟོག་ཐེ་ཚོམ་བསལ་ལ་༴། །ཐུགས་ཀྱི་སྲས་བཞི་ཉེ་བའི་སྲས་བརྒྱད་སོགས། །གདུལ་བྱ་མཐའ་དག་སྨིན་གྲོལ་ལམ་ལ་བཀོད། །ཟད་པར་ཟིལ་གནོན་རྣམ་འཕྲུལ་དཔག་ཡས་བསྟན། །ཀུན་གྱི་སྤྱི་བོས་གཏུགས་ལ་༴། །ཐུབ་པས་ལུང་བསྟན་འཛམ་གླིང་རྒྱན་གཅིག་པུ། །མཉམ་མེད་དྭགས་པོ་རིན་ཆེན་སྤྲུལ་པས་བསྐུལ། །གསང་མཛོད་མ་ལུས་གཏད་ནས་བཀའ་བརྒྱུད་ཀྱི། །བསྟན་པ་ཕྱོགས་བཅུར་སྤེལ་ལ་༴། །ཟབ་མོའི་གསང་ཚིག་རྡོ་རྗེའི་མགུར་དུ་བཞེས། །རང་གི་ཉམས་རྟོགས་གཞན་ལ་ལྷུག་པར་བསྟན། །མཐོང་ཐོས་དྲན་རིག་ཀུན་ལ་ལས་འབྲེལ་བཞག །ཐར་པའི་ལམ་སྟོན་མཆོག་ལ་༴། །འདི་ལྟར་མཛད་པ་མཐའ་དག་རྫོགས་པའི་མཐར། །སྤྲུལ་པའི་སྐུ་བཞག་མྱ་ངན་འདའ་ཚུལ་བསྟན། །བརྒྱད་ཅུ་རྩ་བཞི་ཤིང་ཡོས་རྟ་ཟླ་ལ། །འོག་མིན་གནས་སུ་གཤེགས་ལ་༴། །རི་དང་རྒྱ་མཚོར་བཅས་པའི་ས་ཆེན་གཡོས། །མཁའ་ལས་ལྷ་རྫས་མེ་ཏོག་ཆར་བཞིན་བབས། །དྲི་ཞིམ་སྤོས་ཀྱི་ངད་ལྡང་འཇའ་ཚོགས་འཁྲུག །མཁའ་འགྲོས་གདུང་དབྱངས་བླངས་ལ་༴། །པུར་ཁང་ནང་ནས་ཐ་མའི་མགུར་གསུངས་ཤིང་། །མེ་ལྕེ་གདུགས་དང་རྒྱལ་མཚན་
3-1-6b
དཔལ་ལེར་འཁྱིལ། །རྔ་དང་གླིང་བུ་ཅང་ཏེའུ་དྲིལ་ཆེན་སྒྲས། །ས་སྟེངས་ཁྱབ་པར་གྲགས་ལ་གསོལ་བ་འདེབས། །གང་གི་མཚན་ཙམ་རྣ་བར་སོན་པས་ཀྱང་། །སྲིད་པའི་འཇིགས་འཕྲོག་ངན་འགྲོའི་མུན་སེལ་ན། །ཐལ་སྦྱར་བ་སྤུ་གཡོ་བའི་གདུང་ཤུགས་ཀྱིས། །རྩེ་གཅིག་གསོལ་བ་འདེབས་པའི་དད་ལྡན་རྣམས། །ཚེ་འདིར་མཆོག་ལ་སྦྱོར་བ་སྨོས་ཅི་དགོས། །དེ་ཕྱིར་ཁྱོད་ལ་གུས་པས་གསོལ་འདེབས་ཀྱིས། །བརྩེ་བའི་ཐུགས་རྗེས་འབྲལ་མེད་རྗེས་བཟུང་ལ། །དུས་འདིར་ཁྱེད་དང་མཉམ་པའི་བཀའ་དྲིན་སྩོལ། །ཆོས་ཉིད་ཟབ་མོའི་དོན་ལ་མི་སྐྲག་ཅིང་། །ཆོས་ཅན་མཚན་མའི་གཡེང་བས་མི་གནོད་པར། །སྤྲོས་ཀུན་སྤྲོས་མེད་ངང་དུ་ཉེར་ཞི་ནས། །སྤྲོས་བྲལ་བདེན་པ་མཐོང་བར་བྱིན་གྱིས་རློབས། །བར་ཆད་བདུད་ཀྱིས་འཚེ་བའི་སྐབས་མེད་པར། །ཡུལ་ཀུན་མཐུན་པའི་གྲོགས་སུ་འཆར་བ་དང་། །བྱང་ཆུབ་སེམས་གཉིས་ཆེས་ཆེར་རབ་འཕེལ་ཞིང་། །འགྲོ་ཀུན་བདེ་ལ་འགོད་པར་བྱིན་གྱིས་རློབས། །དམ་ཚིག་སྡོམ་པ་སྲོག་ལས་གཅེས་བཟུང་ནས། །རིམ་གཉིས་མྱུར་ལམ་བརྩོན་པས་བསྒོམ་པའི་མཐུས། །སྒྱུ་འདྲའི་རྒྱལ་བ་ཁྱབ་བདག་རྡོ་རྗེ་འཆང་། །ལུས་འདི་མ་སྤང་ཐོབ་པར་བྱིན་གྱིས་རློབས། །གཏུམ་མོ་འབར་བའི་ཞུ་བདེས་ལུས་ཀུན་ཁྱབ། །འོད་གསལ་སྟོང་པའི་ངང་དུ་དངོས་ཀུན་ཐིམ། །ཟུང་འཇུག་འཇའ་ལུས་རྡོ་རྗེའི་སྐུ་ཐོབ་ནས། །སྲིད་མཚོ་གཏིང་ནས་སྐེམ་པར་བྱིན་གྱིས་རློབས། །སླར་ཡང་ཕྱག་འཚལ་མཆོད་ཅིང་ཉེས་ཀུན་བཤགས། །མཛད་པ་དེ་དག་ཀུན་ལ་རྗེས་ཡི་རང་། །ཆོས་འཁོར་བསྐོར་ཞིང་སྲིད་མཐར་བཞུགས་གསོལ་འདེབས། །དགེ་ཀུན་ཁྱོད་ཀྱི་ཐུགས་དགོངས་རྫོགས་ཕྱིར་བསྔོ། །སྐྱེ་བ་ཀུན་ཏུ་ཁྱེད་སྐུའི་གྲིབ་མ་བཞིན། །འབྲལ་བ་མེད་པར་རྟག་ཏུ་རྗེས་འབྲང་ཞིང་། །གསུང་གི་
3-1-7a
གསང་མཛོད་མཐའ་དག་འཛིན་པ་དང་། །ཐུགས་དགོངས་དབྱེར་མེད་གཅིག་ཏུ་འདྲེ་པར་ཤོག །ཅེས་འཇིག་རྟེན་གསུམ་ན་འགྲན་ཟླ་མེད་པའི་གྲུབ་པའི་དབང་ཕྱུག །རྗེ་བཙུན་ཆེན་པོ་བཞད་པའི་རྡོ་རྗེ་ལ་གསོལ་བ་འདེབས་པའི་ཚིགས་སུ་བཅད་པ་དད་པའི་མིག་འབྱེད་ངོ་མཚར་འོད་ཀྱི་ཕྲེང་བ་ཞེས་བྱ་བ་འདི་ཉིད། ཡིད་དད་གུས་འབའ་ཞིག་གིས་ཀུན་ནས་བསླངས་ཏེ། རྗེ་བཙུན་ཆེན་པོ་དེ་ཉིད་ཀྱི་སྐུ་མཚལ་ལས་བཞེངས་ཤིང་ཕྱག་ནས་ཞུགས་པར་གྲགས་པའི་སྐུ་ལྡེར་གྱི་དྲུང་དུ་ཡུན་རིང་དུ་གསོལ་བ་བཏབས་(བཏབ་)ནས། གྲུབ་པའི་བསྟི་གནས་འགྲན་ཟླ་མེད་པ་འབྲོག་ལ་ཕྱི་གང་ཀྱི་(གི་)རྭ་བར། ཆོས་མེད་སྙོམས་ལས་ཅན་གྱི་སྤྲང་པོ་ནམ་མཁའ་བསམ་གྲུབ་རྒྱལ་མཚན་ཞེས་བྱ་བས། རྗེ་བཙུན་ཆེན་པོ་མྱ་ངན་ལས་འདས་ནས་ལོ་སུམ་བརྒྱ་དང་བཅུ་བཞི་པ། ས་ཕོ་འབྲུག་གི་ལོ་ཆོ་འཕྲུལ་གྱི་ཟླ་བའི་ཡར་ཚེས་བཅུ་ལ་གྲུབ་པར་སྦྱར་བའོ།། །།སརྦ་མངྒ་ལཾ།། །།


目录
རྗེ་བཙུན་ཆེན་པོ་བཞད་པ་རྡོ་རྗེ་ལ་གསོལ་བ་འདེབས་པའི་ཚིགས་སུ་བཅད་པ་དད་པའི་མིག་འབྱེད་ངོ་མཚར་འོད་ཀྱི་ཕྲེང་བ།